Forvaltninga under lupa

Det blir sjølvsagt mest spennande for oss som jobbar i ulike ledd i forvaltninga og i departementet, men også for dei frivillige organisasjonane og ulike fagmiljø som me finansierer. Spennande for oss og forhåpentlegvis nyttig for samarbeidslanda.

Å bli sett under lupa på denne måten kan skape frykt. Frykt for å miste jobben. Frykt for store endringar i arbeidssituasjonen. Frykt for at nokon har skjulte agendaer. Me vel å tru at det meste av frykta er ugrunna og at dei ansvarlege klarar å halde alle involverte godt informerte i prosessen.

For to år sidan var NORAD gjennom ei stor omorganisering. Den var vellykka, ikkje minst på grunn av løpande informasjon og fordi den var godt grunngjeve i at nye arbeidsformer kravde ny organisering.

God informasjon og openheit vil også i dette tilfelle gjera det lettare å fokusere på mogelegheitene. For det er dei som fortener energien til alle involverte. Høvet til å få til ei meir heilskapleg tilnærming til utviklingssamarbeidet. Det er viktig at me innrettar oss på ein måte som gjer det mogeleg å sjå alle bidraga våre i samanheng. Kortsiktig og langsiktig - bilaterale og multilaterale - sivilt samfunn og næringsutvikling, ja, alle dei ulike bistandsformene er viktige for resultata av den samla innsatsen.

Og kanskje endå viktigare er det at bistanden blir sett i samanheng med andre faktorar som påverkar eit lands utvikling. Bistand er viktig, men handel, gjeld, investeringar, politikken til internasjonale finansinstitusjonar og økonomisk politikk i samarbeidslanda er endå viktigare.

I mandatet for evalueringa blir mogelegheitene for å gjera ein betre jobb trekte fram. Det er ei målsetting me alle delar.