Solberg går hardt ut mot Vendepunkt: – Dette gjer Ap kvar gong

I siste episode av Panorama-podkasten Verdensproblemer går Erna Solberg hardt ut mot utviklingsminister Åsmund Aukrust og regjeringas gjennomgang av norsk utviklingspolitikk.

Vendepunkt-prosessen skal munne ut i ei ny stortingsmelding og har involvert ei rekke møte og innspelsrundar med organisasjonar og andre aktørar på bistandsfeltet.

Solberg er lite imponert.

– Eg har 37 års erfaring med dette. Dette gjer Arbeidarpartiet kvar gong dei skal halde på med denne bistandsgreia. Så lagar dei eit seminar som går framover. Så held dei det gåande med massevis av arbeid for organisasjonane. Dette er Arbeidarpartiets modus operandi, seier Solberg.

Lytt til podkasten her:

Ho meiner det i utgangspunktet er ganske klart kva hovudproblemet i norsk bistand er: Noreg spreier innsatsen på for mange land og for mange ulike formål.

– Det er nokre klare ting vi burde gjere. Noreg burde konsentrere seg. Færre land. Det prøvde vi å gjere, seier ho.

Solberg viser til at konsentrasjon også var eit mål for Høgre då partiet sat i regjering.

– Det har vore Høgres bodskap heile tida. Konsentrasjon på land, konsentrasjon på temaområde. Der vi kan gjere ein ekstra effekt.

Ho meiner skiftande regjeringar og politiske prioriteringar har ført til at bistanden stadig blir trekt i nye retningar.

– Så blir det litt rykk og napp. Men det er ingen som eigentleg diskuterer kva som er det riktigaste å gjere.

– Har halde heile sivilsamfunnet oppteke

Solberg rettar også kritikk mot kor omfattande Vendepunkt-prosessen har blitt.

– Eg føler at ein no har halde heile det sivile samfunnet på bistandsområdet oppteke i denne prosessen, i ein slik «koopteringsprosess» inn mot det, seier ho.

Samtidig opnar ho for at prosessen kan ha ein verdi.

– Det kan vere fint med slike tankar også, seier Solberg.

Men dersom ho skal gi Aukrust eitt råd, er det å prioritere langt hardare:

– Konsentrasjon. Vi må vere på færre stader, på færre tema. Og så bør vi prioritere tema som gjer at du byggjer kapasitet i befolkninga til å klare seg sjølv.

Vil kutte småprosjekt gjennom ambassadane

Panorama har gjennom spalta «Kva skal bort?» utfordra aktørar på bistandsfeltet til å peike på kva Noreg faktisk bør slutte å bruke pengar på.

Når Solberg får det same spørsmålet, peikar ho særleg på små bistandsprosjekt som blir forvalta gjennom norske ambassadar.

– Eg ville redusert den aktiviteten vi har gjennom ambassadane for småmidlar, seier ho.

Ho meiner Noreg heller bør samle meir av innsatsen rundt større utviklingsutfordringar.

Særleg trekkjer ho fram utdanning og tiltak som byggjer opp landas eigen kapasitet.

– Eg ville konsentrert meg meir om dei store utviklingsutfordringane, som etter mi meining er utdanning, og det å byggje internasjonale system for å hjelpe landa til å byggje opp sin eigen kapasitet.

Solberg meiner også at mottakarlanda i større grad må bidra med eigne pengar.

– Eg ville vore tydelegare på eigenfinansieringskrava for mange av utviklingslanda.

Tidlegare i intervjuet argumenterer Solberg også for at meir bistand bør gå gjennom større internasjonale organisasjonar framfor ei mengd små prosjekt. Ho meiner det kan gi både betre kontroll og mindre fragmentering.

– Det har blitt ein trend dei siste åra at ein vil putte pengar ut gjennom ambassadar. Små prosjekt. Dette er mykje vanskelegare å kontrollere. Det er mykje betre å bruke dei store og vere samordna, seier ho.

Utviklingsminster Åsmund Aukrust (Ap) har ikkje svart på kritikken innen publisering, men opplyser at han vil komme med et svar.