Norec tek over tilskotsordning
Frå 1. januar 2023 tek Norec over tilskotsordninga for demokratifremming gjennom politiske parti. Ordninga rettar seg mot norske politiske parti og ungdomsparti, og har til no vorte forvalta av Norad.
– Vi er stolte over at vi får ta over denne oppgåva, og vi ser fram til å bruke kompetansen vi sit på, også her, seier avdelingsdirektør i Norec, Margunn Indrebø Alshaikh i ei pressemelding.
Ordninga demokratifremjing gjennom politiske parti er eit avgrensa, men viktig bidrag i utviklinga av demokrati i utviklingsland. Politiske parti og ungdomsparti i Noreg, i praksis 18 organisasjonar, kan søkje om midlar.
Pengane skal gå til prosjekt som går over fleire år, støttar inkludering og tverrpolitisk dialog og bidreg til fleire unge og kvinner inn i politiske parti og partisystem i utviklingsland, i tillegg til generell styrking av parti og partisystem.
Norec er eit kompetansesenter for utvekslingssamarbeid som driftar ei tilskotsordning for utvekslingsprosjekt. Frå 2018 har Norec i tillegg hatt ansvar for å rekruttere nordmenn til jobb i FN-organisasjonar.
– Erfaringa Norec har med å jobbe med unge menneske og kompetanseheving på tvers av kulturar og landegrenser går rett inn i dette, seier Alshaikh.
Ho legg til at demokratifremming passar godt inn med det Norec jobbar med frå før.
– Vi har ein modell som er velprøvd, og som vi veit fungerer. Vi kjem inn med meir ressursar på kurs og læring, og vi skal bruke erfaringa vår til å skreddarsy eit opplegg for dei, seier Alshaikh.
