Afrikanske land har vedtatt ny helseagenda: Skal trene opp tre millionar helsearbeidarar
Tysdag slutta afrikanske helseministrar seg til Africa Health Workforce Agenda 2026–2035 og forplikta seg dermed til å trene tre millionar helsearbeidarar i åra framover.
Publisert
Sist oppdatert
Det melder Verdas helseorganisasjon (WHO).
Målet med agendaen er å styrke helsesystema og sikre at fleire menneske over heile kontinentet får tilgang til helsetenester av god kvalitet, når og der dei treng dei.
Den inneber eit tydeleg skifte frå berre å utdanne fleire helsearbeidarar til også å styrke arbeidsmarknaden i helsesektoren gjennom betre planlegging, utdanning, sysselsetting og tiltak for å behalde helsepersonell.
I dag, medan helseinstitusjonar slit med mangel på personell, står ein million utdanna helsearbeidarar arbeidsledige. Dette gjeld spesielt blant dei nyutdanna, skriv WHO.
Ein viktig del av Africa Health Workforce Agenda er difor å skape moglegheiter, støtte og rammevilkår som gjer det mogeleg for helsearbeidarar å arbeide, utvikle seg og trivast der behovet er størst, seier WHOs regiondirektør for Afrika, Dr. Mohamed Yakub Janabi.
Agendaen blei vedtatt på den 76. sesjonen i WHOs regionale komité for Afrika tysdag 26. august.
Den kjem på eit avgjerande tidspunkt for Afrikas helsearbeidsstyrke.
Antalet helsearbeidarar i regionen har auka betydeleg det siste tiåret og var anslagsvis 5,72 millionar i 2024. Likevel har Afrika berre rundt 46 prosent av helsepersonellet regionen treng.
Utan kraftfulle tiltak kan regionen stå ovanfor ein mangel på meir enn 6 millionar helsearbeidarar innan 2035, skriv WHO.
